في أغنيات منسمعها ومنحبها، وفي أغنيات بتصير جزءاً من ذاكرتنا، وبتحمل إلنا حكايات ومشاعر أكبر من مجرد كلمات ولحن. وهيدا بالضبط حال أغنية «صندوق» لأصالة، الأغنية اللي كل ما بتغنيها، بيغلبها إحساسها وبتسبقها دموعها.
من كم يوم، انتشر فيديو لأصالة خلال البروفات استعداداً لحفلها، وهي عم تغني «صندوق»، قبل ما تغلبها دموعها وما تقدر تكمل. مشهد اختصر حجم ارتباطها بهالأغنية، اللي مش مجرد عمل غنائي بالنسبة إلها، بل مساحة بتلتقي فيها ذكرياتها مع عيلتها وطفولتها وبيتها، وكل التفاصيل اللي بتحمل معها حنيناً كبيراً.
أغنية «صندوق» من كلمات رامي قحطان كوسا، وألحان وتوزيع يزن الصباغ. واللافت إن كوسا سبق وكشف إن كتابة الأغنية ما أخدت منه أكتر من خمس دقايق! وهون بيطرح السؤال نفسه: كيف خمس دقايق بس قدروا يخلقوا أغنية بهالعمق، وتوصل لهالدرجة من الصدق والتأثير؟
وإذا بدنا نحكي عن تأثر أصالة بهالأغنية، ما فينا ما نرجع لحفلها في سوريا، بعد غياب طويل. بهديك الليلة، اختارت تغني «صندوق» وهي قاعدة، وقدّمتها بإحساس مختلف كلياً، يمكن حتى أجمل من النسخة الأصلية.
ويمكن هالشي مش مستغرب، لأنها كانت عم تغنيها ببلدها، سوريا، وبين أهلها وناسها، وفي مكان بيرتبط بكل الذكريات اللي بتحكي عنها الأغنية. وكأن الكلمات بهديك اللحظة ما عادت مجرد كلمات، بل صارت استعادة حقيقية لسنوات ووجوه وتفاصيل غابت وما غابت عن القلب.
وما زاد اللحظة جمالاً كمان، صولو يزن الصباغ ببداية الأغنية، اللي أضاف بُعداً موسيقياً وإحساسياً مميزاً، ومهّد لأداء مليان مشاعر.
ويمكن هون تحديداً سر «صندوق»... إنها مش بس بتاخد أصالة لذكرياتها وبتحرّك مشاعرها، بل كمان بتاخد كل واحد فينا لصندوقه الخاص؛ لصور قديمة، ووجوه منشتاقلها، وأماكن بعدها عايشة فينا مهما بعدنا عنها.
يمكن كرمال هيك، كل مرة منسمع «صندوق»، منتأثر فيها كأنها عم تحكي عنّا نحنا كمان. لأن بعض الأغاني ما بتكون مجرد حكاية صاحبها، بتصير حكاية كل اللي بيسمعوها.
