قدّم ليجي-سي مجموعة من أغانيه بروح موسيقية مختلفة خلال فعالية «YouTube Music Night» في القاهرة، بإنتاج إبداعي من شركة «تكوين»، حيث أعاد تقديم أعماله برفقة فرقة موسيقية حية، في تجربة منحت الأغنيات صوتًا جديدًا يختلف عن النسخ التي اعتاد الجمهور سماعها عبر المنصات الرقمية.
وبعد الحفل، التقت «بيلبورد عربية» ليجي-سي في لقاء حصري، تحدث خلاله عن التجربة ورد فعل الجمهور، موضحًا أن أكثر ما تغيّر في أغانيه على المسرح كان «روحها» نفسها.
وقال: «في الحفل النهاردة، وخصوصًا أنا برضه شفت رد فعل الجمهور، كان بجد جميل جدًا، وانبسطت إن التراكات كلها لقوها بشكل تاني مختلف عن اللي بيطلع على النت والناس بتسمعه في الآخر».
وعن الفارق بين تسجيل الأغنيات بالطريقة المعتادة وتقديمها مع فرقة موسيقية حية، أضاف: «اللي اتغير في الأغاني روحها. يعني كنت دايمًا مثلًا بسمع الأغاني اللي أنا بعملها، لو أنا مثلًا البروديوسر أو في حد تاني بروديوسر، كان أغلب الشغل كله بيتم على الكمبيوتر. الآلات كلها مش دايمًا لازم تبقى متسجلة، ممكن تبقى آلات ملعوبة أصلًا مني على الكمبيوتر، فكان بيبقى صوتها مش حقيقي زي ما بتلعب مع لايف باند أو كده».
ويأتي الحفل بعد أيام من إصدار ليجي-سي أحدث أغنياته «أمارة»، التي طرحها في 24 سبتمبر بالتعاون مع POLYYY، وكتبها ولحنها وأداها ليجي-سي، فيما تولّى POLYYY إنتاجها الموسيقي.
لكن الجديد الذي كشفه ليجي-سي لـ«بيلبورد عربية» يتجاوز الأغنية المنفردة، إذ يعمل حاليًا على ألبوم جديد، بدأ في الأساس كمشروع قصير قبل أن يتوسع تدريجيًا إلى عشرات الأغنيات.
وقال عن المشروع: «المفروض هينزل قريب. هو بصّي هقولك، الموضوع ابتدى إن أنا عايز أعمل EP، أنا خلصت ستة تراكات. فجأة لقيت الموضوع بيوسع مني، بيوسع مني، فجأة لقيت نفسي معايا مثلًا حوالي حاجة وأربعين تراك أنا المفروض أختار منهم عشان أعمل ألبوم».
وتابع: «فلا، الموضوع كان كبير. فالتراكات دي دلوقتي بتخلص، والمفروض إن الألبوم هينزل قريب إن شاء الله، فحاليًا إحنا شغالين عليه. ما بقدرش أقول معاد، عشان أنا ما بحبش أحط معاد وفي الآخر أخلف فيه بصراحة يعني».
وبذلك، ينتقل مشروع ليجي-سي المقبل من فكرة EP من ست أغنيات إلى ألبوم يُختار محتواه من قرابة 40 أغنية، من دون أن يكشف حتى الآن عن موعد رسمي لطرحه.
