يصعب الحديث عن الأغنية الدرامية في مصر، وتحديدًا تترات المسلسلات، من دون التوقف عند اسم مدحت العدل، الذي شكّل عبر عقود واحدة من أبرز البصمات في هذا المجال. انطلق العدل من خلفية بعيدة عن الفن، لكنه سرعان ما وجد صوته الخاص في منطقة تجمع بين الشعر وكتابة السيناريو والتترات الدرامية، حيث لا تُكتب الأغنية بوصفها عملًا مستقلًا، بل كامتداد عضوي للحكاية.
منذ بداياته في التسعينيات، ومع أعمال سينمائية بارزة مثل “آيس كريم في جليم”، مرورًا بمسلسلات تركت أثرًا واسعًا مثل “محمود المصري” و“لأعلى سعر”، لم يكن حضور العدل محصورًا في السيناريو أو الإنتاج، بل امتد إلى صياغة الحالة الشعورية للعمل عبر الكلمات. هنا تحديدًا، تبرز خصوصيته في كتابة التتر: لغة بسيطة لكنها مشحونة بالدلالات، قادرة على تلخيص عالم كامل في جمل قليلة، وعلى خلق علاقة مباشرة مع المتلقي منذ اللحظة الأولى.
ما يميز تجربة العدل أنه لا يتعامل مع التتر كواجب إنتاجي أو عنصر تزييني، بل كمدخل أساسي لفهم العمل، وكأداة يمكن أن تعيش مستقلّة عنه أيضًا. لذلك، كثيرًا ما تحوّلت تتراته إلى ذاكرة جماعية مرتبطة بمواسم درامية كاملة، حيث تختصر الأغنية مشاعر الشخصيات وصراعاتها، وتبقى في الوجدان حتى بعد انتهاء العرض. من هذه الزاوية، يمكن قراءة مسيرته كرحلة بحث مستمرة عن الاختلاف، وعن كيفية كتابة تتر “يشبه العمل”… لكن لا يشبه أي شيء آخر.
في حوار له مع بيلبورد عربية خلال رمضان 2026.. أجاب مدحت العدل على عدد من أسئلتنا حول علاقته بالأعمال التي كتب تتراتها والسيناريوهات الخاصة بها على حد سواء:
- إيه اللي بيميز كتابة تتر المسلسل عن كتابة الأغنية العادية؟
- "إن إنت مرتبط بمعنى المسلسل، مرتبط بخيانة، مرتبط بغدر، وبعدين ممكن ما تعملش الفورما المشهورة في الأغاني، اللي هي مذهب وكوبليهين، ممكن تكتب شعر حر زي ما انت عايزتكتب، مثلاً تتر "الشوارع الخلفية" بيقول "وتدور الايام المتوالية المجنونة" مثلاً او تكتب مثلاً "أيام شبه الأيام لكن مش هي" الخاصة بمسلسل قصة حب، انت هنا مرتبط بمعنى، مرتبط بشكل حر للكتابة أكتر من الشكل التقليدي للأغنية."
- هل بتتعامل مع تتر رمضان باعتباره أغنية ولا جزء من الدراما نفسها؟
- "بتعامل مع تتر رمضان مش باعتباره أغنية، هو أغنية في الأول وفي الآخر، بس هي أغنية مرتبطة بالدراما، أنا معرفش أكتب تتر مسلسل غير وأنا قاريه كله حتى لو مش أنا اللي مألفه، يعني نادراً ما كتبت تترات لمسلسلات مش أنا اللي مألفها، لكن حتى لو ده عملته لازم أقرأ كله، أنا لما مثلا كتبت أغنية "لكل عاشق وطن" في فيلم "أبو علي" كنت قاري الفيلم كله، لما كتبت لعمرو دياب أغنية "طبع الحياة" في فيلم "ضحك ولعب وجد وحب" كنت قاري الفيلم كله، فهو ده الموضوع انه لازم اكون قاري، عشان افهم المؤلف عاوز يقول ايه".
- ما التحدي الحقيقي لدى محاولة كتابة تتر لعمل درامي؟
- "مش فكرة تحدي.. فكرة التجويد فكرة إن أنت عايز تبقى مختلف. فاكر إن أنا عملت تتر مرة هو "الشوارع الخلفية". التتر الأخير ما كنتش كاتبه كده خالص وبعدين سمعته لبنتي فقالتلي حلو. فما حسيتش إنها متشجعة أو بتقولهالي بحماس. فقلتلها يعني إيه حلو؟ قالتلي يعني شبه التترات قلتلها ما هو تتر. قالتلي أيوه ما هو شبه التترات مفيهوش جديد رغم إنه كان عاجب جمال عبد الحميد المخرج وعجب كل الناس. فرجعت قعدت كتبته وعملوا الملحن العظيم عمار الشريعي ومن أجمل التترات اللي أنا كتبتها في حياتي.. اللي هو: "وتدور الأيام المتوالية المجنونة" في التتر الأخير لمسلسل "الشوارع الخلفية".
- إمتى بتحس إن التتر نجح فعلًا؟
- "بحس إن التتر نجح لما ألاقي الناس بتردده، هو التترات بتتعاد كتير قوي لكن في تترات بتنجح وقد تكون سبب من أسباب نجاح المسلسل حتى قبل المسلسل ما ينجح، منهم التتر بتاعي مثلاً بتاع "ملعون أبو الناس العزاز"، التتر نجح ونزل قبل المسلسل بأربع أو خمسة أيام، التتر نفسه كسر الدنيا قبل المسلسل، والمسلسل نفسه نجح جداً، وأعتقد أنه التتر كان سبب من أسباب نجاح المسلسل."
- هل اختيار المطرب بيأثر على طريقة كتابتك للكلمات؟
- لا، لكن مثلا "فاتن أمل حربي" أنا عارف انه لازم واحدة اللي تغنيه وأنا اللي كلمت أنغام على فكرة، وطبعًا لما أكون باكتب لانغام غير لما اكتب لحد تاني، الكلام نفسه واحدة بتغنيه فلازم يبقى له طريقة معينة في الكتابة، لكن في العموم أنا بكتب التتر من غير ما أعرف مين اللي هيغنيه."
- هل بتاخد في اعتبارك ذوق الجمهور أو تريندات السوشيال ميديا أثناء الكتابة؟
"باخد في اعتباري ذوق الجمهور ده طبيعي في كل شغل مش لازم في التترات بس،يعني في الاخر لازم ذوق الجمهور يبقى داخل في اعتباري لان انا بتوجه في الاخر للجمهور انا مش بكتب في الفراغ ولا بكتب لنفسي، لكن ترندات السوشيال ميديا دي مبحطهاش في دماغي ولا عمري حطيتها في دماغي ولا هحطها في دماغي، أنا بكتب اللي مقتنع بيه."
- ما التتر الذي صنعته وترك أكبر أثر في الناس؟
- "في كذا تتر منهم اللي أنا قلته ده اللي هو "ملعون أبو الناس العزاز" منهم التتر بتاع "قصة حب":
ارجع يا زمان حن يا ماضي
أيام الحب ما كان عادي
ولا كان الشوق للناس تهمة
ولا نظرة عين وحنين أزمة
ولا قلب الناس خاوي وفاضي
حن يا ماضي"
- ما نصيحتك لشخص يحاول كتابة تتر لمسلسل أو فيلم؟
- "النصايح بحب أقولها للشعراء الشباب اللي عايزين يدخلوا المجال ده إنه يثقف نفسه إن يقرأ ما حدش يحكي له قصة المسلسل فيكتب على ده هو لازم يقرأ ولازم يبقى فاهم الشخصيات وفاهم المؤلف عايز يقول ايه ولازم تغير عن اللي اتعمل قبل كده مليون ألف حاجة يعني إن أنت تكون حقيقي إن أنت تكون مثقف إن أنت تكون شاعر بجد يعني أعتقد إن هي النصائح بقولها لنفسي وبقولها لغيري أتمنى أنا يعني تقريبًا أنا مش هكتب تترات غير المسلسلات أنا اللي كتبتها وأتمنى لو ده حصل أكتب بشكل مختلف زي ما أنا بحب أعمل في كل حاجة يعني".
